រយៈពេលជាង ៣២​ឆ្នាំ ក្រុមហ៊ុន ខេមបូឌា បេវេរេដ ខមប៉ានី (កូកា-កូឡា) បានផ្តល់ភាពស្រស់ស្រាយ និងគាំទ្រដល់សហគមន៍កម្ពុជា ដោយមោទនភាព តាមរយៈភេសជ្ជៈដែលផលិតនៅកម្ពុជា ដោយកូនខ្មែរ សម្រាប់ប្រជាជនខ្មែរ។ ថ្ងៃនេះ ក្រុមហ៊ុននៅតែបន្តការប្តេជ្ញាចិត្តរយៈពេលវែងរបស់ខ្លួន ក្នុងការរួមចំណែកអភិវឌ្ឍសហគមន៍ និងការអភិរក្សបរិស្ថាននៅកម្ពុជា។

កាលពីថ្ងៃទី១២ កក្កដា ឆ្នាំ២០២៥ បុគ្គលិកក្រុមហ៊ុនជាង ៦០នាក់ បានរួមសហការជាមួយអង្គការជឿជាក់លើសិស្សជនបទកម្ពុជា (CRST) មន្ទីរបរិស្ថានខេត្តសៀមរាប និងអាជ្ញាធរជាតិអប្សរា ដើម្បីដាំដើមឈើកំពស់ជាង​ ២ម៉ែត្រ ជាង ១០០ ដើម និងបរិច្ចាគកូនឈើចំនួន ៤០០ ដើម ជូនដល់សហគមន៍រុនតាឯកតេជោសែន ដែលជាទីក្រុងថ្មីនៃខេត្តសៀមរាប។

នេះជាការដាំបន្ថែម ពីលើដើមឈើចំនួន ១០០០ដើម ដែលបានដាំ និងបរិច្ចាគ កាលពីឆ្នាំ ២០២៤កន្លងទៅ។ គំនិតផ្តួចផ្តើមនេះ គឺជាផ្នែកមួយស្របតាមគន្លងយុទ្ធសាស្ត្រអភិវឌ្ឍន៍ប្រកបដោយចីរភាពឆ្នាំ២០៣០ របស់ក្រុមហ៊ុន ខេមបូឌា បេវេរេដ ខមប៉ានី (កូកា-កូឡា) ក្រោមទិសស្លោក “ជម្រើសយើង អនាគតយើង” (Our choice, Our Future) និងបានបង្ហាញពី “ភាពម្ចាស់ការលើចីរភាព“។]

លោក Paulo Gaspar Rodrigues អគ្គនាយកប្រតិបត្តិក្រុមហ៊ុន ខេមបូឌា បេវេរេដ ខមប៉ានី (កូកា-កូឡា) បានថ្លែងថា «ជាង ៣២ ឆ្នាំកន្លងមកនេះ ក្រុមហ៊ុនយើងខ្ញុំពិតជាមានមោទនភាព ដែលយើងខ្ញុំជាផ្នែកមួយនៃវឌ្ឍនភាពរបស់កម្ពុជា តាមរយៈការផ្តល់ភាពស្រស់ស្រាយដល់ប្រជាជនកម្ពុជាជាបន្តបន្ទាប់ ព្រមទាំងតបស្នងចំពោះសហគមន៍ដែលតែងតែស្វាគមន៍យើងខ្ញុំតាំងពីគ្រាដំបូងដែលយើងមកទីនេះ។ យើងខ្ញុំជឿជាក់ថា អនាគតដ៏ល្អប្រសើរមួយ ត្រូវផ្តើមចេញពីការសម្រេចចិត្តក្នុងថ្ងៃនេះ។ ដូចនេះ រាល់ដើមឈើដែលយើងបានដាំ នឹងជួយសហគមន៍យើងឱ្យរុងរឿង និងគាំទ្រដល់អនាគតមួយប្រកបដោយចីរភាពសម្រាប់កម្ពុជា»។ យើងបានឱ្យឈ្មោះកម្មវិធីនេះថា «ពលរដ្ឋល្អ» (Good Citizenship Program) ។